http://www4.0zz0.com/2007/08/09/12/54241593.gif

^
^
طبعا ً هالمستشفيات وغيرهم سته مادري سبعه كلهم الوزاره قابضه فلوسهم !!
يعني وزارة الصحه عرضت على مجلس الوزراء هالمشاريع وتمت الموافقه عليهم والبلديه
حددت مواقعهم وفوق هذا تمت تسميتهم واستلمو فلوسهم , بس متى يبلشون فيهم !؟
الله اهو العالم !!

كنت اسولف مع رفيجي عن اهم وزارة خدمات وهي الصحه وعن الوضع السيء اللي فيها
والزحمه والدور اللي يسبب لك مرض نفسي قبل لا تخلص من مرضك الاولي !
وان العلاج بالخارج امر لابد منه كون العلاج اهني مستواه متدني بس فيه ناس خربو على اللي صج مستحقين انهم يتعالجون برا , ليش انهم يسافرون عن طريق الواسطه وعلاجهم اساسا ً متوفر بالكويت !
فـ كان رده وفعلا اقنعني , انه بالكويت فيه علاج لـ 90 % من الحالات اللي تسافر للخارج !
مثلا ً السرطان له مستشفى مختص ومتطور
القلب نفس الشي وفوق هذا اكو جراحين كويتين نجحو بزراعة القلب !
الكسور والعلاج الطبيعي هم لهم مستشفيات مختصه !
جراحة الاطفال , جرحات التجميل , الحروق و و و , امراض كثيره علاجها متوفر بالكويت وبأختصاص بعد وبأجهزه حديثه ومتطوره !
هذا كله حكومي طبعا ً غير الخاص !!

انزين وين المشكله او الخلل !؟
المشكله بس بالتنظيم ! , كون كل هالمستشفيات المتخصصه ماكو منها اثنين !
يعني اهو بس مستشفى واحد يخدم كل اهل الكويت وهالشي غلط واهو اساسا المشكله !!
صعبه على دكتور او على المستشفى بكبره انه يخدم باليوم مايقارب الألف حاله
غير الحالات اللي متواجده عنده اساسا ً !!
يعني لو بنقسم الـ 8 ساعات يلي يداومهم الدكتور على 100 حاله بس !
راح يطلع لكل مريض 4 دقايق وجم ثانيه بسسس !!
وهالشي نفسيا ً راح يضايق المريض ولا راح يريحه كون الدكتور ما اعطاه وقت كافي للعلاج !
الا اذا الدكتور ساحر هذا شي ثاني ! , لان 4 دقايق ماتلحق لـ فحص سليم ..
وغير انه المريض ناطر من جم ساعه وهذي آخرتها ! ..
وماتلوم الدكتور كونه يدري انه برا فيه اوادم تنطر دورها وبـ اعداد كبيره !

الحل انه لازم تطلع هالمشاريع للنور ويتم العمل عليها وانشائها بسرعه
منها لان وزارة الصحه اهم وزاره بالدوله وثاني شي راح توفر اموال وميزانيات كبيره للدوله !
العلاج عنده متطور وممتاز بس ناقصنا التنظيم والتوسع بس !


هذا شي !!
والشي الثاني مثل ماقلتي ان المناقصات تُمنح لـ حراميه بالعربي الفصيح او لـ ناس غير ذي كفائه وفقط للتربح مو للانجاز !
اقولج شغله !؟ والله والله من الاشياء اللي تتعبني انا كـ مواطن انه حتى مواقف سيارات بـ عدد مناسب ماكو !
اذا من برا جذي ! بالله من داخل شلون !؟
عندنا تضخم بالميزانيه وليش ان القانون الدولي يمنع التضخم المالي لـ حد معين فالكويت توزع الفايض كـ قروض للدول , اي لييش زين !؟
عدلو فيه عندنا

الله يعين
والله يشافي مرضانا ومرضى المسلمين
ويعز هالديره بـ اهلها وابنائها : )

مشكوره  

أخوي خطاوينا شاكرتلك هالرد العميق بضمون ماكتبت

أخوي أولا سالفة مشاريع وبعدها ماطلعت لنور أنا خلني أتكلم من باب تجربة أحد من الأهل متبرع تقريبا بحدود مليونين وشيء وصار هالحجي له جم سنه وعينك ماتشوف إلا النور .. بعده المشروع ماتم غير حجر الأساس الي هشك بشك لصحافة بس

وللأسف أن المبلغ راح يتم فيه بناء قسم مادري جناح فقط بمستشفى من مستشفيات الديره

الحجي ياخوي مو مسألة أن كل شيء متوفر بس فيه عدد كبير من المرضى مايستوعبهم المستشفى الشيء الي يقهر فعلا

بعيد الشر عنك وعن الأهل أنت زرت مريض بمستفى صار له مده متنوم راح تشوف العجب العجاب على سبيل المثال أكسجين لمرضى الربو تلقى متوفر بجناح كامل جهازيين فقط ؟؟ بالله مستشفى هذا ولا بيت

إذا الجناح فيه فوق العشرين مريض شلون جهازيين ومكروفين كراف بعد يغطى كل هالمرضى

السبب أولا لسوء الإدارة والبخل الحكومي الغير مفهوم وبحزتها تبرعات مينونه لبناء وأعمار لبنان أي ليش إن شاء الله ماتهدم هالمستشفيات ونشوفها بعيونا قبل مانندفن بقبورنا

المسالة الثانيه أن كرت زيارة يتم من بعدها عمل عمليات اكبر من طاقة المستشفيات بالكويت إذا كل واحد من برا أيي عشان يسوي عمليات الدنيا وألف هندي ومصري ما احترامي لكل الجاليات صاف وكويتيين هما صافين بالله الدكتور متى له خلط يغطي ويفهم حالة المريض

ضيف عليهم دكاترتنا وينهم وين الكويتيين ليش قامت دول الخليج تلقفهم مو بسبب سوء الإدارة عندنا .. اسوء معاشات بالبلد تعتبر تبع لمكانتهم العلميه أهما الأطباء والاستشاريين وبعضهم حتى درجته الي استحقها من جامعات بأمريكا وكندا وغيرهم تحتاج لجلسات واجتماعات عشان يعترفون فيها اي انتو منو بالله ؟؟ وهشلون تبعثونه وعقب اطيرونه برا الديره

الديره مانختلف أن فيها خير والشعب يعشقها بس للأسف غالبيتهم بالحجي

نبي فعلا ونهضه صحيحه للبلد مو مسشفيات هدام وأجهزه مصديه وأطباء حاذفينهم ديارهم واحنا نتلقفهم والسبب أن معاشاتهم أرخص من عيالنا

هالموضوع أنا من أكثر المواضيع الي فعلا تستفزني لأن حرام كل هالعلاج موجود وبالمجان وحتى مستشفيات مفتوحه لكنها مو مواكبه تطور وتوفر الراحه مثل ما أهوه مطلوب منها  

وكاهو مستشفى الجهراء احترق !!
وتوفو فيه اثنين رجل وإمرأه ..!
مبنى متهالك وتمديدات كهربائيه رديه واكل عليها الدهر
جم مستشفى لازم يحترق وجم واحد لازم يموت علشان نلتفت لمشكلة نقص المباني المتطوره والعصريه في وزارة الصحه !
تدرين شنو اللي حرني زياده !؟
انه ماجد الشطي اول ما انتهى من اذاعة هالخبر انتقل لـ خبر ثاني وبدا كلامه بـ / وتفاعلا ً مع المتضريين من الفيضانات بمروتانيا لازال الجسر الجوي الكويتي يواصل عمله ..!!
انزين اوكي وماقصرتو
ومتضررين الكويت منو يساعدهم !؟
ماليزيا والا باكستان والا لبنان !؟
ماقلنا شي قضاء قدر بس حتى الدول اللي تساعدونهم هم قضاء وقدر ..!


الظاهر مستشفى الجهراء تفاعل ويا موضوعج :/ واحترق  

أخوي خطاوينا صبحك الله بالخير أنت قريتي بوستي عدل :) .. وأنا أختك أنا كاتبه البوست عشان هالموضوع

يعني مو مني محترق أنا الي كتبت الموضوع لما شفت خبر الحريق بمستشفى الجهراء اليوم الظهر

وعسى الله يحرس الكويت .. وشنقول عن حكومتنا عطوا الي تبون ووزعوا وأكلوا الفلوس بالعافيه عليكم بس قبل كل هالشيء عمروا الكويت وطورها بسنا لعب بفلوس هالديره وعيالها يحترقون بخراباتها

وحياك مرة ثانيه :)  

واي محاره اليوم اتصفح الجريده واقرا الخبر،واشوف الصور وقلبي يعورني
تسوا الروع والخوف اللي صار فيهم؟
امس يدتي تقولي بنيتي انا اسوي غسيل كلى،شنسوي اذا صار حريق واحنا مقززين ابر ومعلقين على هالاجهزه؟
تصدقين مادري شقولها
قلت كل واحده تدز جهاز الثانيه
:(
هذي حاله بديره خير
هذي الكويت؟
واي بس يتني البجيه
:(  

مادري أبجي ولا أضحك .. حلوه كل وحده ادز جهاز الثانيه

اي والله يوخيتي شيء يضيق الخلق

ما أحب أشوف بعمري الكويت بهالصوره ولا أحب أنقدها حيل بس المشكله أن نبيلها الأفضل نبيها تطور بس شلون ومتى

شيء يضيق الخلق من قلب  

ماكو تعليق هالمره ..!!! غير بس

الشكوى لله

وسلامتج  

مساج الله بالخير محاره

شوفي هذه السالفه الكل يعرفها وواضحه سالفة المناقصات ولعبهم بالفلوس

بس وين الضمير الحي؟؟

ليمتى الواحد يلعب بحق غيره؟؟

واذا عن معصومه يكفي اكبر دليل على عدم تحملها للمسؤليه واخذها الوزاره لعب في لعب ولغايات في نفسها
انها اول ما تسلمت الوزاره راحت سيدا وسفرت بنتها للخارج على بو انه علاج

اولا بنتها غير كويتيه شلون تسافر؟؟

ولا عشان امها الوزيره؟؟

بعدين بنتها مو مريضه وفضحوها لما قالولها عطينا تقرير بنتج

شوفي السالفه كلها اكل بأكل الله يسامحهم  

احنا فى الشهور اللى طافت صارت المصيبة لا ننساها الا بمصيبة
كم من المشاكل التى مررنا بها ولا ننسها الا بمصيبة جديدة
نحن بابتلاء فعلينا ان ننتبه لما يحدث

وموضوع المستشفي بنظري ان جميع المرافق الحكومية اتحدى ان يكون هناك مراقبة على اجهزة الامن والسلامة
وان يكون هناك متابعة لما يحدث
وتأكدى اى مرفق ستدب فيه الحرق ان لم يكن جديد لن تفتح فيه اى منفذ من منافذ الامن والسلامة

وبعدين تعالى شوفى الهواش لو يبون يسون مستشفى كل واحد من التجار راح يتهاوش على لمناقضة  

هلا أخوي يوسف والنعم بالله .. والله يعينا

مشكور على تواصلك .. ولا تقاطع  

هلا أختي امبراطـــورة اشعاري .. بسالفة بنتها مادري عنها

وعن شخصية الوزيره هما ما أقدر أقول شيء غير أنها ماتتحمل المسؤوليه وماشفنا تطور بأي وزاره تمسكها

السالفة عندنا بالكويت مو بس على وزير صرنا جنه الكونغرس الأمريكي واحد يروح غيره يتبدل بس السياسه نفسها ماتتأثر خير شر

وهذا الي حاصل مع كل وزارة الدولة إلا ماندر وهو الوزير الحميدي الوحيد الي شفت العالم تمدحه برا وزارته وداخلها من جذيه الريال ماطول لأن يبي الإصلاح من قلب مو حجي

ومشكوره على تواصلج أختي  

اتفق وياك اخوي مشاري .. السالفة مو بس أمن وسلامه بالمرافق الحكومه

بعيد الشر خلنا من الحوادث الحين بوقت السلم .. أنت شايف المرافق الحكوميه شلونها؟؟

وزاراة جينكو جنه بسنة الهدام !! ولا وزارة من عمر الدنيا بعماير مأجره انزين ليش منو قال راح نخلي الكويت ونمشي !!! مادري

حكومتنا وتجارنا بس يبون يبوقون والدليل مو هامهم تصير شكل الوزارة وبنايات الدولة راقيه ومطوره عمرانيا ومهنياً

الله يعين .. يرتفع ضغطك لما تشوف وزارة الديره بهالمستوى .. بيوت الكويتيين أحسن منها مليون مره  

محاره شنقول بعد عيزنا واحنا انتكلم :\
شي يعور القلب لما تشوفين هالبلاوي تصير بديرتج ..

لا كهربا لا مستشفيات لا و لا


الحمدلله على كل حال  

أي والله الحمد لله على كل حال .. وانت الصاجه شيء يعور القلب تشوفين هالشيء يصير بديرة الخير والسبه هالبشر الي ماتخاف ربها

مشكوره يالغاليه على تواصلج وبسج بخل نبي نقرأ بوستات رقيقه من ايدج شدي الهمه :)